Пред локалните избори убиени тројца кандидати во Ирак
30.01.2009 09:24
Тројца кандидати за локалните власти во Ирак се убиени вчера, во пресрет на локалните избори, кои се закажани за утре. Сите тројца политичари се припадници на сунитското малцинство, соопшти полицијата. Кандидатот на Листата за национално единство Хазем Салем Ахмед е убиен пред неговиот дом во Мосул, главниот град на северната провинција Нинева. Кандидатот на Ирачката исламистичка партија Имар Фарук ал Ани е убиен во багдадскиот кварт Амирија, од страна на вооружени лица, по одржувањето на предизборен собир. Третиот кандидат, Абас Фархан од Националното движење за реформи и развој е убиен во село покрај градот Мандили, во провинцијата Дијала, североисточно од Багдад, исто така по предизборен митинг. Уште најмалку двајца кандидати се убиени за време на предизборната кампања, но американските и ирачките официјални претставници тврдат дека нема пораст на насилството пред првите локални избори по 2005 година. Ирачаните на утрешните избори ќе изберат лидери на 14 од 18-те провинции во земјата.
|