Рикер: САД нема да ја смени политиката кон Македонија

Ирина Гелевска	Коментари (9)

Рикер: Сигурни сме дека блиските односи со Македонија се добри и за нас

Кој и да победи на претстојните претседателски избори, односите меѓу САД и Македонија ќе останат многу добри, истакна новиот американски амбасадор Филип Рикер во ексклузивна изјава за А1.

„Двајцата претседателски кандидати, сенаторот МекКејн и сенаторот Обама се проамериканци и знаат што е најдобро за американските интереси во светот. Сигурни сме дека блиските односи со Македонија се добри и за нас“, рече Филип Рикер, амбасадор на САД.

Само еден месец од неговото доаѓање, Рикер попладнево ги покани на скара сите македонски војници кои учествувале во мировната операција во Ирак, нешто што тој им го ветил на македонските мировници во мај годинава, при посетата во базата Таџи, за време на неговата претходна служба во Ирак.

Мирослав Стојановски

Последните македонски војници ќе се повлечат од Ирак во декември. Началникот Стојановски вели дека има притисоци од сите страни за зголемување на македонските војници во Авганистан, но апелира сите да имаат трпение.

„Секако дека ќе има зголемување на бројната состојба, меѓутоа, мислам дека сеуште е рано да се излегува со било каква конкретна информација за тоа со кои сили и со која бројна состојба ќе продолжиме со мисиите надвор од Република Македонија“, изјави генерал Мирослав Стојановски, началник на ГШ на АРМ.

САД сакаат да ја видат Македонија во НАТО, вели американскиот амбасадор.

„Ние сме силни поддржувачи на Македонија за влез во НАТО и го охрабруваме решението за единствениот проблем што останува за да членството на Македонија стане реалност“, вели Рикер.

Рикер најавува дека кој и да победи во ноември и стане нов американски претседател во јануари, американската амбасада во Македонија ќе продолжи да работи за заемните интереси на двете држави.

За печатење

Прати по e-mail

Порака до авторот

Разгласи