Парното ќе поскапи
26.06.2008 17:46
Поскапува парното. За две недели ќе се знае точно за колку проценти. Регулаторната комисија за енергетика заврши со увидот во топлификациите во Скопје. Сега се очекува анализата од контролата, по што регулаторите ќе одлучат за колку проценти ќе има поскапување. Зголемените цените на мазутот притиснаа и на парното, имајќи го во предвид фактот дека „Топлификација Скопје“ топлинската енергија ја произведува со користење на мазут. Последното поскапување на парното беше кон крајот на февруари. Тогаш Регулаторната комисија за енергетика донесе одлука за зголемување на цената на парното кое имаше ретроактивно дејство. Граѓаните добија повисоки сметки за јануари и февруари. Во Скопје Север сметките се зголемија за 8,9%, а „Топлификација Скопје“ доби зголемување за речиси 18%. Но, оваа одлука на регулаторите за зголемување на цените на парното со ретроактивно дејство, Уставниот суд на Македонија вчера ја поништи. Судот заклучи дека поскапувањето не може да важи од 1 јануари годинава, бидејќи одлуката за корекција на цената на топлинската енергија била донесена кон крајот на февруари. За судот ваквата одлука не е во согласност со Уставот. Оваа одлука на Уставниот суд ќе предизвика дополнителен притисок врз новата цената на парното греење. Сега „Топлификација“ ќе мора да им ги враќа парите на граѓаните, а потоа регулаторите загубите на „Топлификација“ најверојатно ќе ги вкалкулира во најновото поскапување, кое се очекува за две недели.
|