Можен е монопол во мобилната телефонија

Александар Момировски	Коментари (2)

Уште неразбиен во фиксната, Македонија е на пат да добие монопол и во мобилната телефонија. Најавите за преземање на грчки „Оте“ од страна на „Дојче телеком“ го разбранија телекомуникацискиот бизнис во земјава.

„Ти Мобајл“ и „Космофон“ ќе имаат еден газда, единствен конкурент ќе им биде „ВИП оператор“.

„Будно го следиме развојот на настани во врска со можната аквизиција на дел од акциите на грчки „Оте“ од страна на Дојче телеком“, изјави Никола Љушев, главен извршен директор на „ВИП оператор“.

„Доколку последниот развој на глобално, односно регионално ниво почне да влијае на македонскиот пазар на електронски комуникации, веруваме дека Комисијата за заштита на конкуренцијата професионално и во согласност со својата ориентираност за заштита на конкуренцијата ќе преземе соодветни мерки да го заштити пазарот на мобилна телефонија, а пред се корисниците од евентуално монополско однесување“, вели Љушев.

Клучниот договор за зделката се очекува да падне утре. Според неофицијалните информации „Дојче телеком“ во преговорите со грчката Влада бара да има контрола во одлучувањето во „Оте“.

Во земјава Германците преку „Ти Мобајл“ имаат повеќе од милион корисници, Грците преку „Космофон“ повеќе од половина милион корисници или заедно држат околу 90% од пазарот.

Во законот за заштита на конкуренцијата стои дека монопол може да се појави ако некој субјект има контрола на повеќе од 40% од клиентите и услугите, но за да се утврди монопол треба да се проверат дополнителни критериуми.

Надлежните ќе почекаат официјално известување од финишот на зделката за да ги почнат анализите.

„И ако утврдиме дека е таков, тогаш преземаме она што повторно законот ни го пружа како можност, да забраниме таква концентрација, да му наложиме на веќе спроведениот договор да претрпи извесни модификации во смисла на растурање на таквиот нов пазарен монструм“, рече Чедомир Кралевски, Комисија за заштита на конкуренцијата.

„Дојче телеком“ пред два месеца за 2,5 милијарди евра понуди да откупи 20% од капиталот на грчки „Оте“ што го поседува инвестициската компанија „Марфин Инвестмент Груп“.

Извршувањето на зделката е условено со договор со грчката Влада, „Дојче телеком“ да откупи и дел од нејзините акции.

Грчката Влада, пак, во „Оте“ поседува 28% од капиталот. Вработените во телекомуникациската компанија денеска стапија во дводневен штрајк, во обид да ја натераат Владата да не му ги продава акциите на „Дојче телеком“.

За печатење

Прати по e-mail

Порака до авторот

Разгласи