Граѓаните го сметаат ветото за недемократско
03.04.2008 18:17
Веста дека Македонија не е примена во НАТО, поради спорот со Грција за името, граѓаните на земјава ја дочекаа на нож. Сметаат дека одлуката е неправедна, недемократска, контрапродуктивна, која покажува дека НАТО нема своја константна политика. Размислувањата на македонските граѓани одат до таму што на државно-владиниот врв му порачуваат да ги прекине преговорите за името. Но, кај дел од нив се уште владее оптимизмот дека со продолжување на разговорите ќе успееме во нашите евроатлантски намери. „Ова уште еднаш покажува колку е Грција фашистичка земја и колку грчкиот национализам е убедливо најупорен, најстрашен на Балканот. Ако е тоа некој мал пораз за Македонија, оти така го сфаќам, тоа е голем пораз за некоја демократија и сфаќање на правичност во широка смисла“, вели граѓанин. „Мислам дека не е реално, мислам дека требаше да влеземе во НАТО. Не требаше воопшто да одиме во НАТО, требаше сите да облечеме униформи на НАТО и да излеземе во Авганистан и во Ирак, да им помогнеме на сиромашките Американци. Се зависи од Грција, од нас ми се чини дека не зависи ништо сега засега“, рекоа граѓаните. Инаку, денеска пред грчката канцеларија за врски ја немаше вообичаената фреквенција на луѓе, додека неколкумина граѓани кои тропаа на вратата не беа удостоени со каков било одговор. Покрај вообичаеното полициско обезбедување, пред грчката канцеларија за врски имаше и воена полиција. Сепак, очите на минувачите повеќе беа насочени кон разголената манекенка, која пред дипломатското претставништво позираше за еден од македонските весници.
|