„Форбс“: Преспа - Охрид меѓу најатрактивните во Европа
01.02.2008 10:39
Светскиот бизнис-магазин „Форбс“ ја избра Македонија меѓу најатрактивните дестинации за возење во Европа. На неговата вебстраница Forbes.com's, рутата од Преспа до Охрид преку Галичица е препорачана како една од 20-те најдобри дестинации. Својата топ-листа за пејзажни возења магазинот ја прави по мислење на експерти кои предлагаат свои фаворити. Македонската рута е предложена од Кристофер Делисо, патописец за „Lonely Planet“ и автор на најновиот патепис за Македонија „Скриена Македонија“. Тој за читателите на „Форбс“, исто така, предлага и една рута во Бугарија и една на грчкиот остров Крит. Според написот на „Форбс“, Делисо препорачува „патување од Преспа до Охридското Езеро меѓу тесни, ветровити патишта, што ве водат низ јаболкници и светилишта на птици околу Преспанското Езеро и потоа нагоре кон планината Галичица и низ високиот премин Ливада, кратката прошетка до блискиот рид ви нуди истовремено поглед на двете езера, Преспанското и Охридското езеро“. За секое специјално избрано место, експертите предлагаат и според нив фаворит возило за патувањето. За прекрасниот езерски регион во Македонија Делисо го препорачува новиот „Фолксваген буба“.
|