Лидерите од ЕУ го потпишаа европскиот договор
13.12.2007 19:16
Конечно крај на долгата институционална криза во Европската Унија, предизвикана по неуспешните референдуми во Франција и Холандија за донесување на европскиот устав. Со потпишувањето на „Лисабонскиот договор“ 27-те земји членки на унијата се договорија за поедноставно раководење и донесување одлуки и отворија пат за прием на нови членки. „Ако сакаме заедница на затворени општества и економии, колективна безбедност и човекови права, развој кој гарантира иднина на нашата планета со предизвиците на климатските промени, тогаш ЕУ мора да носи одлуки со кои ќе ја обликува глобализацијата“, изјави Жозе Мануел Баросо, претседател на Европската комисија. Со Лисабонскиот договор, кој треба да биде ратификуван во парламентите на земјите членки и на референдумот во Ирска унијата ќе добие претседател со две и пол годишен мандат, со што ќе се укине шест-месечното ротациски претседавање со унијата. Во иднина одлуките во 50 области ќе се носат со мнозинство гласови, а не едногласно, како што беше досега. Консензус на сите членки ќе им биде потребен во заедничката надворешна политика, одбраната, социјалните прашања, даноците и културата. Социјалната повелба засега ќе биде обврзувачка за 25 од 27-те земји членки на унијата, бидејќи Британија и Полска издејствуваа изземање од оваа обврска Полска, исто така, до 2014 година ќе има поголеми права во гласањето, од она што и следува, според бројот на жители. Британскиот премиер Гордон Браун, освен што подоцна го потпиша договорот, бидејќи одлучи да не присуствува на свечената церемонија не ја потпиша ниту декларацијата за поддршка на заедничките симболи на унијата - знамето и химната. Иако формално-правно ја нема силата на устав со „Лисабонскиот договор“ Европската Унија на подолг рок ќе се стабилизира, како урамнотежена структура на поделен национален и наднационален суверенитет. Договорот ја остава отворена можноста, во иднина унијата да прерасне во европска федерација со повеќе централизирана политичко-економска и воена власт.
|