Групата на Јакупи била опремена за долготрајно војување
10.11.2007 19:28
 | | Билјана Ванковска | | | |
По заплената на тешкото воено софистицирано оружје во полициската акција „Планинска бура“ на Шара и потврдата од полицијата дека се работи за терористи организирани заради непријателска дејност, експертите препознаваат екстремистичка група подготвена да дејствува според плановите на оние кои можат да ги платат. Сето тоа е во контекст на сложеноста на безбедносната состојба во регионот поврзана и со разврската на косовскиот статус. „Тоа се луѓе кои се обучени за војување, кои веројатно, како што покажува и самото оружје, имаат големо искуство и во ракување со тоа оружје од претходните војни и сега во пресрет на една ситуација во која ќе имаме разврска на регионалната ситуација, тие можат своите услуги да ги стават на една или на друга страна“, изјави Билјана Ванковска, универзитетски професор. „Ако се има во предвид моменталната состојба во регионот, не би и одговарало на ниедна од земјите во регионот да дојде до некакви цели со помош на ваква вооружена групација, тогаш очигледно дека тие не би можеле да бидат ангажирани од страна на државните органи, туку би можеле да бидат, пред се, ангажирани во смисла на платеници или како што во светот се нарекуваат, кучиња на војната“, рече д-р Благоја Марковски, Балкански форум за безбедност. Според МВР, најверојатно оружјето не било планирано да остане во Бродец, а намената била да се преземе голема активност. Полицијата во текот на истрагата ќе треба да утврди кога и по кои патишта е внесено оружјето.  | | Благоја Марковски | | | |
„Од она што воените стручњаци го видоа на теренот, најиндикативни се „стингерите“, односно тоа се ракети упатени за соборување хеликоптери. Кога ќе ги соберете елементите, се поставува тезата дека тоа се луѓе кои се добро обучени од некој што располага со софистицирано оружје и тоа е правено во подолг временски период“, вели Ванковска. „Некои показатели зборуваат дека оваа вооружена група се стационирала во Бродец, на Шар Планина, некаде во периодот од пред два-три месеци. Тоа значи дека тие навистина плански дошле во тој регион и плански се подготвувале за определени борбени активности“, изјави Марковски. „Меѓутоа, не можеме однапред да прецизираме во кој регион би можела да дејствува оваа групација. Со оглед на тоа што таа е откриена на територијата на РМ, можно е под притисок на безбедносните структури на Косово да пребегнале на територијата на РМ и тука да нашле плодно тло“, додаде Благоја Марковски. Сложеноста на ситуацијата, посочуваат аналитичарите, бара подготвеност на институциите, легитимност на полициските акции, кои не смеат да се злоупотребуваат во политички цели, а од друга страна, стрпливост кај јавноста и доверба во полицијата во извршување на уставните надлежности.
|