11 повредени во акцијата „Планинска бура“
08.11.2007 15:48
Вкупно 11 повредени луѓе синоќа и рано утрото биле хоспитализирани по акцијата на МВР „Планинска бура“. Шестмина од нив се уште се наоѓаат на интензивна нега. „Кај двајца се констатирани огно-стрелни повреди, едниот од нив има повреда во пределот на стомакот, тој е опериран и се наоѓа на Клиниката за интензивно лекување - КАРИЛ. Уште пет пациенти кај кои се констатирани тапи повреди на различни делови од телото и тие се примени исто така на Клиниката за интензивно лекување“, изјави Соња Стошиќ, портпарол на Ургентен центар. Врз единствениот полицаец, за кој доцна синоќа МВР потврди дека е ранет, бил извршен хируршки зафат на неговото колено повредено од шрапнели. Тој заедно со уште четворица други се пуштени на домашно лекување, од што може да се претпостави дека четворицата не биле членови на групата на Јакупи. Болнички извори не сакаат да прецизираат дали меѓу повредените има цивили или и други специјалци. Само потврдија дека сите се македонски државјани. Вчера на прес-конференцијата министерката за внатрешни работи Гордана Јанкуловска, придружувана од безбедносниот врв, тврдеше дека во акцијата на Шара немало ниту еден повреден полицаец, ниту пак цивил. „Досега нема пријавено повредени или починати цивили и припадници на полицијата“, рече Гордана Јанкуловска (вчера). Хеликоптери и денеска летаа од реонот на акцијата кон клиничкиот хелиодром. Клинички центар се уште е под силно полициско обезбедување.
|