Нови измамени од ГИА Инженеринг
21.10.2007 00:00
Расте бројот на измамени лица во случајот „ГИА инженеринг“. Полицијата по дополнителните проверки утврдила дека сопственикот на фирмата, Ѓорѓи Шоптрајанов во периодот 2005 - 2006 година измамил уште девет граѓани, од кои бесправно заработил над 260.000 евра препродавајќи еден ист стан на повеќе лица. Станува збор за деветмина кои уплатиле пари за 13 станови во спорниот објект на ул. „Емил Зола“ во општина Кисела Вода. Парите за изградба на становите, оштетените граѓани ги уплаќале на каса - прими во фирмата, дел преку банка со уплата на жиро сметка, а имало и граѓани кои средствата му ги предале лично на рака, без да добијат било каков документ за извршената уплата. Шоптрајанов од почетокот на октомври е во притвор, поради измама на граѓани при продажба на станови прикривајќи го фактот дека становите претходно ги продал на други лица. Полицијата тогаш утврди измама од речиси 80.000 евра, но се проценува дека криминалот е тежок неколку милиони евра. Не се знае дали истите измами ги правел и во зградите во скопски Чаир, Центар и други општини каде градел. Со овие нови девет утврдени случаи, бројот на измамени граѓани официјално потврден од МВР е 59.
|