Државна матура ќе се полага, протестите продолжуваат
21.09.2007 00:00
И по вториот ден од протестите на средношколците, Министерството за образование не попушта, ќе се полага државна матура, и тоа пет предмети, онака како што тврдеа учениците, а не два, како што кажа вчера заменик министерот за образование Јован Лазаров. Тој денеска ја поправа грешката, не бил добро разбран. „Можеби не бев прецизен вчера. Значи, полагаат два предмети екстерно, два интерно и уште проектна задача“, изјави Јован Лазаров, заменик министер за образование. Ќе се полага мајчин јазик и математика или странски јазик, по избор на учениците, два општи предмети и по една проектна задача. Од образование велат дека државната матура ќе биде услов за упис на факултет, затоа што следната година нема да има приемни испити на државните универзитети. Претставници на Министерството за образование се сретнаа денеска со средношколците во Влада. Но, ниту Министерството отстапува од матурата, ниту учениците од протестите. „Наставниците сметаат дека секој своите ученици доволно ги подготвува. Ние учениците сметаме сосема спротивно, така што не знаеме како ќе се одвива. Никој не се чувствува доволно подготвен, ниту училиштата, ниту учениците“, вели средношколка. Учениците се револтирани затоа што учат по стара програма, а ќе полагале по нова. Од Министерството смируваат, во матурските тестови нема да има содржини што учениците не ги учеле. „Не е проблем матурата, проблем е тоа што работиме по застарена програма којашто нема да се полага во матурата. Учебниците по кои ние учиме сега се уште од 1970-1980 година, од време на Југославија“, рече средношколец. „Испитните задачи во државната матура ќе бидат така конципирани што ќе бидат пресек од она што секој ученик во средното образование го поминал низ својот наставно-образовен процес“, изјави Перо Стојановски, државен секретар за образование. Продолжија протестите на учениците и во Струмица, а скопските средношколци го блокираа целиот град. Од Министерството за образование, отидоа пред Влада, од таму пред Собрание и повторно се вратија пред Владата. Сите институции денеска ги обезбедуваа специјалните единици на МВР.
|