Средношколците протестираа против матурскиот испит
20.09.2007 00:00
Со фрлање јајца и домати кон Министерството за образование, средношколците бараа да се одложи и годинава полагањето на матурскиот испит. Пред Министерството се собраа околу 2.000 средношколци од сите скопски училишта. Масовни беа и протестите против полагањето на матурата во Струмица и Штип. Средношколците велат дека не треба да полагаат матура, затоа што учеле според старата програма. 
„Протестираме затоа што не сакаме да не третираат како глувци во лабораторија кои се спремаат за експерименти. Доаѓаат во трета година и ни кажуваат дека ќе полагаме државна матура во четврта. Тоа треба уште од прва година да ни го кажат, за да бидеме поспремни“, изјави средношколка. „Никој не ни кажа ништо, ни кажуваат сега, на крајот, четврта година. Како ние да се спремиме за шест месеци да полагаме матура? Ние сме единствена генерација која е по старата програма. Матурата е премногу обемна, не сме компјутери за да можеме тоа да го запаметиме“, велат средношколците. Од Министерството за образование не попуштаат. Велат, по минатогодишното одлагање, се знаело дека оваа година ќе се полага матура. Во ноември ќе има пробни матурски испити, со кои учениците ќе се увереле дека крајниот испит нема да биде многу тежок. Ќе полагаат само два предмети - македонски јазик и уште еден изборен, а не пет, како што велат средношколците. „Во 2007-2008 година во законот за високо образование е предвидено дека услов за упис на универзитетите е положен матурски испит. Од тие причини Министерството за образование и наука нема да го одложи полагањето на матурскиот испит“, рече Јован Лазаров, заменик министер за образование. Поради нарушување на јавниот ред, двајца средношколци се приведени од полицијата на информативен разговор. Од МВР велат дека и двајцата биле полнолетни, а учеле во хемиското училиште „Марија Сколдовска Кири“ во Скопје.
|