Канада ја призна Македонија под уставното име
20.09.2007 00:00
Канада е 118-та земја што ја призна Македонија под уставното име. По дипломатската операција, во која биле вклучени претставници на МНР, претставници на македонската дијаспора и членови на канадската Влада, вчера официјална Отава ја објави одлуката за признавање на уставното име во билатерална комуникација. Пратеникот во канадскиот Парламент Луј Темелковски вели дека бил потребен многу напор да се убеди Владата во Отава во исправноста на одлуката. „Не беше лесно, бидејќи имаше доста голем притисок од секаде, за да не ја признае Македонија под уставното име, но јас кога го претставив тоа во Парламентот, тие сите реагираа. Некои реагираа позитивно, некои негативно, но сабајле разбравме дека Владата на Канада го прифати тоа“, рече Луј Темелковски. Признавањето на Канада се случува во време кога спорот за името влегува во финална фаза. Се очекува Метју Нимиц пред Нова година да даде уште еден, најверојатно последен предлог за името. Претседателот и Премиерот зазедоа заеднички став за евентуалниот развој на настаните. За што се зборуваа, не кажуваат. „Би рекол дека тука имаме заеднички позиции со господинот Црвенковски, така што сега само ги реафирмиравме, а за некои нови работи што се можни да дојдат изградивме заеднички позиции“, изјави Никола Груевски, премиер. „Со овој потег на Канада дополнително се зајакнува меѓународната положба на Република Македонија по едно од најважните прашања за нас, а тоа е зачувување на уставното име на нашата земја“, рече Бранко Црвенковски, претседател на РМ. Денеска реакциите од Грција по потегот од Канада релативно умерени. Старо-новата грчка Влада, незадоволна од одлуката на Отава, најави демарш до канадската Влада. Портпаролот на Бакојани изјави дека Грција не е среќна со една ваква одлука. Поддршка за грчкиот став за името Бакојани наредните денови ќе бара од генералниот секретар на ОН Бан Ки-Мун, преговарачот Метју Нимиц и помошникот државен секретар на САД Николас Барнс. Во меѓувреме, јавното мислење во Грција релативно поумерено. Угледни грчки интелектуалци бараат барем мала отстапка од Македонија за да се стави крај на сагата за името. „Секаква мала, навистина мала промена на името. На сите им е јасно дека терминот Македонија ќе биде централен елемент од името. Но, потребна е некаква навистина мала промена“, изјави Танос Докос, Хеленска фондација за европска и надворешна политика. „Можеби Македонија напишана според транскрипцијата на јазикот во земјата или Македонска република. Има повеќе предлози со кои нема да му се наштети на уставното име на земјата, а од друга страна, ќе ја задоволат грчката јавност“, додаде Докос. Спорот за името меѓу Македонија и Грција трае веќе 16 години. Досега на маса беа повеќе предлози, но истите беа отфрлени. Пред приемот на Македонија во НАТО се засилува меѓународниот притисок за решавање на спорот.
|