Бугарија повторно не ја регистрира ОМО Илинден Пирин
04.09.2007 00:00
Бугарските власти го прекршија договорот постигнат во јуни меѓу Судот за човекови права во Стразбур и претставници на Владата во Софија, да се регистрира ОМО Илинден Пирин. Со образложение дека партијата немала 600 членови на основачкото собрание, Софискиот градски суд повторно го одби барањето на ОМО да се регистрира партијата којашто формално беше укината во 2000 година поради антидржавни активности. Иако по сесијата на Комитетот на министри одржана на 5 и 6 јуни, Секретаријатот на Судот за човекови права практично и наложи на Софија да ја регистрира партијата, судот во Софија го отфрли барањето за регистрација и ја исфрли од трката за градоначалници на октомвриските локални избори. „Пресудата можам да ја окарактеризирам како најголемиот правен апсурд што се случил досега за овие 17 години. Судот не истакнал никакви правни аргументи, практично нема ниту еден доказ“, рече Стојко Стојков, ОМО Илинден Пирин. „Се што е внатре наведено се шпекулации, директни лаги и работи што на судот не му се работа. На пример, еден од аргументите е дека во Бугарија немало македонски етнос. И тоа е аргумент за да биде одбиена регистрацијата“, додаде Стојков.  | | Стојко Стојков | | | |
Според извори во Стразбур, официјални бугарски претставници веќе изразиле жалење до Судот за човекови права за одлуката на бугарските судови, изразувајќи надеж дека Врховниот суд ќе одговори позитивно по жалбата на ОМО Илинден Пирин. Според дипломатски извори, Бугарија ќе мора да ја регистрира партијата, но намерата била во оваа фаза со одлуката на Софискиот суд да се купи време и да се оневозможи ОМО Илинден Пирин да учествува на локални избори закажани за 28 октомври. Рокот за пријавување на партиите на изборите истекува на 12 септември, до кога сигурно Врховниот суд на Бугарија нема да расправа за ОМО Илинден Пирин.
|