Двајца пациенти од Психијатриската болница во бегство
05.08.2007 00:00
Двајца пациенти од Психијатриската болница опасни за околината се се уште во бегство, откако вчера беше откриено дека во болницата недостасуваат 14 душевно болни. 12 се веќе пронајдени, некои дома, други во кругот на болницата. Се почнало за време на доручекот и делењето на терапијата, кога директорот Идриз Орана во рутинска контрола открил дека од 31, се присутни само 17 болни. Веднаш ја алармирал полицијата. „Само двајца пациенти не се на одделението, од кои едниот на 31-ви е пријавен како избеган, а другиот во текот на претходниот ден, така што во моментот четири се на пробно, а двајца се избегани и во тек е постапката“, изјави прим. д-р Мери Ј. Кујунџиска, Психијатриска болница Скопје. Според полициски извори, меѓу 14 избегани има такви што извршиле убиства врз свои блиски во тешко психичко растројство. Еден ја фрлил баба му од шести спрат. Друг ја усмртил мајка му со 40 и ја ранил баба му со 13 убоди од нож. Судското одделение не е обезбедено од затворската управа. Има само еден медицински техничар, и покрај тоа што во него престојуваат лица кои во состојба на душевно растројство направиле кривично дело. Судското одделение е преполно. На 28 кревети има 31 пациент. Не е тешко да се избега, бидејќи пациентите слободно се шетаат во кругот на болницата. „Можат да излезат како и сите други, затоа што сепак ова не е затворска установа туку е болница“, рече Кујунџиска. Орана уште пред еден месец побарал од министерствата за правда и здравство да му пратат обезбедување за да се реши проблемот со честите бегства од Психијатриската болница. Од затворот Идризово му ветиле дека ќе му пратат еден чувар како засилување, но дури откако ќе добијат дозвола да примат нови.
|