Душевната болница ги нарушила правата на Стојковиќ
20.06.2007 00:00
 | | Владимир Стојковиќ | | | |
Душевната болница Скопје сериозно ги нарушила човековите права на 26-годишниот Владимир Стојковиќ при неговото задржување на лекување, потврди и Народниот правобранител. По објавувањето на веста вчера, Правобранителот направил увид во психијатриската болница и утврдиле дека при недоброволното задржување на Стојковиќ не бил известен судот. „Не навлегувајќи во медицинскиот третман, за жал, од увидот во документацијата констатиравме дека установата не постапила согласно законот за вонпроцесна постапка за задржување во здравствена организација за лекување на душевни болести“, изјави Уранија Пироска, портпарол на Народниот правобранител. Во случаи како овој, каде лицето приведено од полицијата по поплака на граѓанин со прва помош поради невозможна комуникација бил однесен во душевната болница, според законот за третман на лица во психијатриски болници, лекарот кој го хоспитализирал бил должен најмногу до 48 часа да побара дозвола од судот за негово понатамошно лекување. „Доколку лицето е сместено во психијатриска установа, законската обврска е во рок од 48 часа да биде изведен пред судија, односно судот да биде известен за основата за лишување од слобода и судот е тој кој што во вонпроцесна постапка одлучува дали лицето ќе биде задржано во психијатриска установа или не“, рече м-р Петар Јорданоски, НВО „Коалиција за неправично судење“. Здружението на психијатри застана во одбрана на душевната болница. Според нив, лекарите во болницата ги запазиле сите аспекти на давање помош на пациентот, но сепак постоел пропуст. „Во тек е соработка со судовите за изнаоѓање механизми за разрешување на овој долгогодишен проблем на присилна хоспитализација“, велат од Здружението на психијатри. И МВР реагираше, Хелсиншкиот комитет од око утврдил дека на Стојковиќ му биле загрозени човековите права, бидејќи полицијата била должна да спроведе постапка на секоја пријава. Потресната приказна за три и пол месечното лекување на Владимир Стојковиќ во душевната болница во Бардовци, без судска одлука, беше објавена во месечниот извештај на Хелсиншкиот Комитет.
|