Притвор за возачот кој ја предизвика несреќата кај Ќафасан
03.05.2007 00:00
30-дневен притвор за Британецот Ник Морли. Не ја извозе рутата 3000. Ќе остане во Македонија. Ќе одговара за смртта на Владимир Чепуњоски, кој синоќа загина во сообраќајна несреќа кај Ќафасан. Директно се судрија голфот на Чепуњоски и поршето на Морли. Владимир почина на пат кон Клиничкиот центар во Скопје, а неговата сопруга Маргит Чепуњоска се бори за живот. „Жената е во критична состојба, со скршеници на ребра, со излив во белите дробови, сместена е во одделението за интензивна нега“, изјави Борче Георгиевски, директор на Клинички центар Скопје. 
Сообраќајката се случи вчера околу 18 часот на патот кон граничниот премин Ќафасан. 30-годишниот бизнисмен и професионален рели возач Морли бил дел од трката „Гембол 3000“, во која светскиот џет сет во своите милионски лимузини го шетаат светот. Морли веднаш по несреќата избегал, оставајќи го зад себе своето порше. Уапсен е на граничниот премин, во обид да влезе во Албанија со друго возило, исто така дел од релито „Гембол“. „Лицето на граничниот премин Ќафасан било приведено во патничко возило „БМВ“ со руски национални ознаки“, рече Иво Котевски, портпарол на МВР. Заедно со Ник Морли беше уапсен и Метју МекКонвил, но тој е ослободен. Двајцата беа приведени во струшката полиција, а потоа беа на распит кај истражен судија. Морли ќе го бранат тројца адвокати - Драган и Александар Гоџо и Љупчо Наумовски. Против Ник Морли поднесена е кривична пријава за загрозување на безбедноста во сообраќајот и неукажување помош. Драган Гоџо за А1 изјави дека не е вистина дека Морли избегал, туку се упатил во полициска станица, каде самиот ја пријавил несреќата. Оваа година рутата „Гембол 3000“ минува низ 35 земји. Македонија беше дел од трите илјади километри како транзитна земја. Но, немаше да слушнеме дека светските ѕвезди, глумците Орландо Блум, Хајден Кристенсен, поп пејачот Џемироквај, данскиот фудбалер Јирген Јенсен, вчера минале по патиштата низ државава, ако не се случеше кобната сообраќајка.
|