Скопското Кале ќе се реставрира и истражува
01.03.2007 00:00
Во 2007 и 2008 година ќе се истражуваат, санираат, конзервираат и реставрираат бедемите и кулите во југозападниот дел на скопската тврдина Кале, со цел таа да се спаси од натамошно руинирање. За овој потфат, владата одобрила два милиони евра, досега најголема сума што државата ја издвоила за археологијата. „Скопската тврдина е проект од капитално значење за македонската археологија, историја и култура. Нејзиното комплетно истражување, конзервација, реставрација, ревитализација е долг процес, нема ние се да направиме“, изјави Паско Кузман, директор на Управа за заштита на споменици. Археолошките истражувања ќе почнат на 15 март, ќе траат до јули, со нив ќе раководи професор Драги Митревски, областа е поделена на шест истржувачки сектори, на кои ќе работат по двајца археолози. Кузман не се сомнева дека Калето крие значајни артефакти. „Од византиско, па рано византиско, па уште подлабоко лириско, па македонско, па архејско и така натаму, сето тоа ќе мора да излезе, ако го има“, додаде Кузман. Проблем за истражувањето ќе биде ресторанот „Меркез“, чиј сопственик добил имотен лист за земјиште на кое се наоѓа споменик на културата од прва категорија. Кузман денеска ги уверуваше медиумите на албански јазик, дека ќе вклучи и археолози Албанци, како дел од полемиката со нив, заради инсинуациите дека наводно имал намера да сокрие докази за Илирида. Инаку, последните истражувања на тврдината се вршени на крајот на шеесеттите години и истакнати археолози изнесуваа претпоставки дека токму Калето ја крие тајната на Јустинијана прима.
|