Иницијатива за промена на имињата на улици и институции во Чаир
26.01.2007 00:00
Паркот во Чаир ќе се вика „Мајка Тереза“, стадионот на Слога југомагнат „Чаир“, булеварот пред стоковната „Илинден“ „Скендербег“, а „Крсте Мисирков“ „Азен Лити“. Ова се само дел од предлозите на иницијативата за промена на имињата на улиците и институциите во општината Чаир. На списокот се најдоа и Тони Блер, Бил Клинтон, Весли Кларк. Граѓаните поделени околу промената на постоечките имиња од историјата со имиња на политичари. „Ако треба и Џорџ Буш ќе ставиме име, како што имаме Џон Кенеди. Тоа не би требало да биде така, улиците си имаат имиња, кое е најреално, тоа нека биде. Поарно да си ги имаат имињата како досега, македонски личности што значат историја. Нека стават на Киро Глигоров, на некој Албанец, а не вака“, велат граѓаните. Според градоначалникот на Чаир, преименувањето немало да биде под импресии од дневната политика. Сепак, има посебно барање до градот Скопје. „Наше барање ќе биде најмалку 20% од имињата на булеварите, на главните улици во рамките на градот Скопје да носат имиња од личности и од настани на албанската историја“, рече Иџет Меџити, градоначалник на Чаир. Откако предлозите, меѓу кои се најдоа и првата кралица на Илирите Теута, Јашар Беу, но и Битолски конгрес, 24 март 1999-та, ќе ги разгледа советот на општината и ќе состави листа, владина комисија треба да го даде последниот збор. Иако дебатата беше јавен повик до сите владини и невладини институции на територијата на општината Чаир да предложат имиња, расправата се одвиваше само на албански. Не беше обезбеден превод на македонски, ниту на јазиците на заедниците.
|