Владата заинтересирана за приватизацијата на „Агроплод“
16.10.2006 00:00
Спорната приватизација на „Агроплод“ го привлекува вниманието на Владата. Ќе се анализира како и на кој начин српски „Свислајон“ на Драшковиќ дојде до државниот пакет акции. Од Министерството за економија официјално велат, се е законски во продажбата на државниот дел од ресенската фабрика. „Свислајон“ го купил пакетот преку јавен повик. Ги уплатил понудените 1,1 милион евра и досега вложил два и пол милиони евра во нова опрема од предвидените шест милиони. Бунтовниците, во случајот Китинови, како предводници на групата незадоволни акционери, го спорат инвестирањето на „Свислајон“. Тврдат дека Србите ставаат во функција стари машини од „Агроплод“, а ги прикажуваат како нова инвестиција. Во обид да ја стопираат нелегалната приватизација, Китинови веќе доставиле жалба до Врховниот суд, ама процесот со месеци тапка во место. Тврдат дека со директна помош на градоначалникот Бузлевски, кој важи и за локален бизнис моќник, „Свислајон“ влегува во Ресен. Српскиот магнат важи за финансиер на СПЦ и поборник за паралелна црква во Македонија. Откако стана газда на сите тамошни кондиторски компании, сега бизнисот го шири и во Македонија. Бизнис скандалот со „Агроплод“ допрва треба да се разрешува. Идната недела во Скопје доаѓа хрватскиот претседател Месиќ, со бизнис делегација. И преставници на „Краш“ ќе бидат меѓу гостите. Ќе треба да им се објасни зошто не го добија кондиторскиот бизнис во Ресен, што преку премиерот Санадер претходно им бил ветен од високи државни функционери во Скопје.
|