„Свислајон“ стана доминантен сопственик на „Агроплод“
23.06.2006 00:00
Српската компанија „Свислајон“ на Радољуб Драшковиќ стана доминантен сопственик на „Агроплод“ Ресен. Денеска на берзата ги купи и државните акции, со што сега поседува 52% од ресенската фабрика. За пакетот државни акции од 26,6% Драшковиќ плати 1,1 милион евра. Со денешната и со трансакцијата од пред два месеци српскиот бизнисмен Драшковиќ го реализираше превземањето на „Агроплод“ Ресен. Тогаш од вработените купи 25% од капиталот за еден милион евра. За денешниот пакет акции, кои беа клучни за доминантна сопственост на ресенската фабрика, државата имаше објавено тендер. Битката се водеше меѓу бизнисменот Китинов и „Свислајон“ на Драшковиќ. Китинов и неговите партнери поседуваат 35% од капиталот на фабриката. Обвинуваат дека продажбата на државниот пакет акции е незаконска, оти за нив тие веќе водат судски спор, а државата не смеела да ги продава. Неодамна во изјава за А1 Китинов тврдеше дека продажбата на капиталот е договорена работа меѓу српскиот бизнисмен Драшковиќ и домашни владини функционери. Родољуб Драшковиќ преку „Свислајон“ веќе ги купи сите кондиторски фабрики во Србија. Сега капиталот го шири на македонскиот пазар.
|