ПИОМ ги продава акциите во македонските фирми
18.05.2006 00:00
Државниот пензиски фонд ги продава акциите што ги има во македонските фирми. Аукциската продажба ќе се случи преку берзата на 2 јуни, за две недели. Се продаваат акции во 110 фирми и удели во други осум - во „Алкалоид“, „Фершпед“, „Макпетрол“, „Агроплод“ и во други компании. Процентот што се продава е различен. Од еден до 25 проценти од акционерскиот капитал. На еден месец до избори Фондот за пензиско осигурување планира од продажба на акционерскиот капитал да заработи огромни 36 милиони евра. Директорот на ПИОМ, Китановски, денеска е на службен пат надвор од земјата. Вели, утре ќе објасни зошто дури сега одлучиле да ги продаваат акциите. Експертите сметаат, ПИОМ многу порано требаше да се ослободи од акционерскиот капитал во македонските компании. Вака, случајно или намерно, се совпаѓа со предизборниот период. Спорни се и цените по кои се нудат акциите. На пример, акциите на „Алкалоид“ на пазарот се продаваат за 4.071 денари по акција. ПИОМ ги нуди по 1.500 денари. И акциите на „Фершпед“ ќе привлечат интерес. Шесте проценти од најмоќната шпедиција во државата ПИОМ ќе ги нуди по речиси двојно помала цена од продажната. Наместо по 65.000 денари за акција, како на берзата, ПИОМ ги продава за 37.500 денари. И „Тиквеш“ и битолската фабрика се продаваат поевтино. Ако пензиско не ги продаде во првиот рок на 2 јуни, ќе се објави втор термин со намалени цени.
|