Ќе се истражува трансакцијата на „Свислајон“
04.04.2006 00:00
Комисијата за хартии од вредност истражува дали „Свислајон“ законски ги купи 25-те % акции од „Агроплод“, дознава А1. Под какви услови, дали требало да има јавен повик за откуп на целата компанија, комисијата не сака да прејудицира каква ќе биде одлуката. Денеска експресно реагираше и најголемиот акционер во „Агроплод“, Китинов откако „Свислајон“ го посочи како виновник за загубите во фабриката од два милиони евра. Вели, тоа е лага. Со „Агроплод“ управувал само два месеци. „Веќе 8 месеци немаме пристап таму. Која е грешката на Китинови што месец и половина беа со управувањето. Ниедна наша одлука ниту беше донесена, ниту спроведена“, изјави Ѓорѓи Китинов, акционер во „Агроплод“. Еден ден откако „Свислајон“ ги купила акциите, Драшковиќ бил кај Китинов. Не постигнале договор за заеднички бизнис. И двајцата ќе се борат за државниот пакет акции. Откако пред десет дена ја прогласи за компанија од посебен интерес, Владата ќе има дискреционо право да одлучи кому ќе ја продаде. Китинов останува на ставот дека некој му прави пат на „Свислајон“. „На повеќе од 300 мали акционери им беа блокирани акциите од локалните политички структури и наеднаш 25% од акциите им се одземени на луѓето и дадени на „Свислајон“. Немам ништо против, но ние, со 250 евра не можеме да ги докупиме“, рече Китинов. Предупредува дека дел од акциите не смеат да се продаваат. Иако прогласени за државни, тој тврди дека се негови и дека незаконски му се одземени. Спори со комисијата за хартии од вредност. Досието „Агроплод“ го доставил и до Антикорупциската комисија и Европската мисија.
|