„Свислајон“ се подготвува за преземање на „Агроплод“.
31.03.2006 00:00
„Свислајон“ се подготвува за преземање на управувањето во „Агроплод“. Идната недела ќе ги обелоденат пред јавноста намерите за бизнисот со ресенската фабрика. 25% од акциите ги купија од 400 вработени. Платија вкупно еден милион евра. Прв човек на „Свислајон“ е Родоуб Драшковиќ, брат на српскиот шеф на дипломатијата, Вук Драшковиќ. Од компанијата велат дека роднинските релации на Вук со Родољуб немаат никакво влијание во бизнисот на „Свислајон“, тоа е фирма основана во Швајцарија со мултинацинален капитал. Но, неговите главни бизниси се во Србија. Ги поседува „Таково“, „Јувитана“ и уште неколку српски фабрики за храна. На вчерашната трансакција реагираа останатите акционери. Тврдат дека со амин на високи владини функционери се оди на варијанта „Свислајон“ да стане доминантен акционер во најголемата фабрика во Ресен. А1 побара одговор од градоначалникот, Димитар Бузлевски, која е вистината околу продажбата на „Агроплод“. Тој не сакаше да коментира. Според акционерската структура, слободни остануваат уште 35% од капиталот на компанијата. Главната битка сега ќе се води за државниот пакет акции. Кој ќе го добие, ќе стане газда на „Агроплод“. На едната страна се бизнисменот Китинов со неговите партнери, на другата е Родољуб Драшковиќ со неговиот „Свислајон“.
|