Првите 180 македонски аџии од Мека слетаа на Петровец
17.01.2006 00:00
Првите 180 македонски аџии од Мека слетаа на Петровец, со директен лет од градот Џеда во Саудиска Арабија. Никој од нив ниту стапнал, ниту поминал низ Турција, каде се регистрирани повеќе случаи на птичји грип. Сепак, покрај роднините, на дочекот аџиите беа пречекани и од лекарските екипи. Зад затворени врати дознале дека аџиите се чувствуваат добро и им поделиле упатства: да се јават на лекар наредните пет дена. „Сите контроли ги завршивме, се направивме. Се е добро“, изјавија аџиите. Доцна вечерва треба да пристигнат уште два авиона со аџии. И нив ќе ги чекаат претставници на Исламската верска заедница. „Патниците се здрави, во добра кондиција и сите добија решение за петдневен здравствен преглед и за вршење на потребна анализа“, изјави Хаџи Јакуб Селимовски, директор на одделот за верски прашања во ИВЗ. Прегледите беа брзи и тајни. Санитарно-здравствената контрола не можевме да ја регистрираме, бидејќи не ни беше дозволено снимање внатре во аеродромот. иако беше ветено, не добивме изјава ниту од лекарите кои вршеа лекарска контрола на аџиите. Стравот од птичјиот грип не остана само на Петровец. Според нашите информации, и во струмичкото село Банско ветеринарни инспектори тајно земале мостри од угинатата живина, иако се покажа дека кај нив нема вирус. Светот се организира, експертите велат, нема време за чекање. Во Пекинг се собраа претставници на стотина земји и организации. Целта им е да соберат милијарда и пол долари за борба против птичјиот грип.
|