Загинатите македонски аџии во Мека се од струшко Октиси
17.01.2006 00:00
Шадие Цаноска и Каплан Цаноски од струшкото село Октиси се двајцата загинати аџии во Мека. Веста за нивната смрт по стампедото на аџиите, нивните семејства ја примиле во саботата. Тие сега ги чекаат останатите аџии од групата да се вратат и да им кажат што всушност се случило. 50-годишната Турчинка Шадие на аџилак заминала со својот сопруг со авион, нејзините синови ги затекнавме во молитва, во џамијата, веднаш до семејната куќа каде Шадие го водела трговскиот дуќан. „Ние се гордееме што нашата мајка го даде својот живот за својата вера, извршувајќи ја својата должност, извршувајќи го петиот исламски столб, Хаџат“, изјави Неџад Цаноски, син на загинатата. Свекорот на Шадие, веста за смртта ја разбрал од продавачката во неговиот дуќан во Струга. „Имало и една жена во болница, но денес утрово, починала и мене паника ми дојде“, рече Малиќ Цаноски, свекор на загинатата. И вториот загинат аџија од Октиси, 57-годишниот македондски муслиман Каплан Цаноски, пензионер кој работел во Швајцарија, во Мека отишол со сопругата, а неговото семејство не сакаше да зборува за настанот. На аџилак во Мека, годинава, од струшкиот регион, отидоа 50-тина аџии од кои 30 од Октиси, село со 5.000 жители, Македонци-муслимани и православни христијани. Меѓу аџиите од Македонија во Мека еден починал од природна смрт, а четворицата повредени во стампедото во земјава ќе бидат вратени утре изутреина со третиот авион со аџии од Мека.
|