Ризикот за пренесување на птичјиот грип не е зголемен
16.01.2006 00:00
Вирусот на птичјиот грип секојдневно мутира, но сеуште не се пренесува од човек на човек. Ризикот не е зголемен. Ова е заклучокот од конференцијата во Луксембург што Македонија го дозна дури после три дена по завршување на состанокот. Европската комисија побарала од земјите членки и кандидатите за прием да изготват национални планови и да започнат со антивирусна терапија, секоја според своите можности. „Не се забранува патување во Турција и патувањето во Турција не претставува епидемиолошки хазард. Аеродромското патување, патување со железница не претставува ризик“, изјави д-р Жарко Караџовски, член на тимот кој беше во Луксембург. РЗЗЗ има изготвено оперативен план, но Владата допрва треба да го усвојува. Проблематичен е фактот препораките на Европската комисија тројцата експерти три дена ги чуваа само за себе, без да и ги соопштат на јавноста. А Европа бара навремено и објективно информирање за се што се случува со птичјиот грип. „Ние како Министерство за здравство сме должни да му поднесеме извештај на тој што не праќа, а мене ме прати колегата, Министерот за здравство. Оној момент кога ќе не пратите вие во мисија би можеле и вам да ви дадеме информации“, рече Караџовски. Во Турција дури денеска е формиран национален координативен центар за контрола на птичјиот грип, кој ќе собира податоци и ќе ја информира јавноста. Таму веќе пристигнаа експерти од СЗО и САД кои ќе испитуваат десетици илјади луѓе за евентуалната зараза. Меѓународните организации испратија лекови. ФАО предупреди дека е можно болеста да стигнала во соседните земји. Опасност и се заканува и на Молдавија, Украина, Бугарија и Ирак, изјави Самјуел Јуци, раководител во ФАО. Грција и Албанија ги засилија мерките за заштита на границите. Македонија превземала се што е потребно за да се заштити, тврдат во Министерството за здравство.
|