Снегот повторно ја изненади Македонија
11.12.2005 00:00
Снегот повторно ја изненади Македонија. Поради денешните обилни врнежи на снег, посебно во западна Македонија, отежнат е сообраќајот на речиси сите патни правци. Коловозите се влажни, а на некои има и снежна покривка. Засега само една посериозна сообраќајна несреќа. Двајца патници се повредени откако автобус на туристичката агенција „Хисар“ утринава излетал од патот кај Кичево. Најголеми застои вообичаено има на планинските превои, кај Стража и Плетвар, како и патот Маврово-Дебар. На овие правци забранет е сообраќајот за тешките моторни возила, а за лесните е задолжителна употребата на зимска опрема. „Сеуште сообраќајот се одвива отежнато, во зимски услови на скоро сите патни правци во државата. Ова особено се однесува за западниот и југозападниот дел, каде врнежите од снег на патните правци се поинтензивни“, рече Димче Ашиков, АМСМ. „Ние препорачуваме крајно внимателно возење и прилагодување на брзината спрема условите на патот“, додаде Ашиков. Од аеродромот „Петровец“ информираат дека поради временските услови авионот на МАТ од Цирих не слетал на скопскиот аеродром, додека авионот на компанијата „Ал Италија“ за Милано, кој требаше да полета попладнево, одложен е за утре. Железничкиот сообраќај во земјава се одвива нормално, додека меѓуградските автобуси од југозападниот дел пристигнуваат со задоцнување од половина час. Вечерва во земјата времето ќе биде облачно со врнежи од снег, а во југоисточните делови од дожд и снег. Температурата ќе се движи од минус два до четири степени.
|