ВМРО-НП бара оставка од генералот Стојановски
27.11.2005 00:00
Во Народна сметаат дека Стојановски не грешел само во Вуковар туку и во Македонија, кога пред 10-тина година со своите единици бил подготвен да пука во македонските граѓани кои протестирале. Тоа е познато минато на Генералот и може да се злоупотреби против државата, оценуваат во ВМРО-Народна и бараат да си даде оставка. „Стојановски со ваквото минато секогаш може да биде марионета или предмет на уцена од страна на странски служби“, изјави Јован Андоновски, генерален секретар на ВМРО-Народна. „Со тоа би се довел во прашање целиот безбедносен систем. Тоа би значело катастрофа за безбедносниот систем“, додаде Андоновски. Во ВМРО-ДПМНЕ порезервирани - треба да се види дали има вистина во обвинувањата на хрватските медиуми против Началникот на Генералштабот на АРМ. „Доколку има, можеби генералот Стојановски треба да размисли и од морален чин да си даде оставка“, рече Никола Груевски, претседател на ВМРО-ДПМНЕ. Хрватска за Стојановски ќе оди до крај, тоа го најави денеска нивната министерка за правда Весна Шкаре Обжолт која вели, сите воени злосторства во Хрватска мора да завршат со правен епилог. Но прво ќе се чека да заврши истрагата против генералот Стојановски покрената од државното обвинителство во Вуковар, врз основа на документацијата на хрватските власти. Хрватските медиуми го обвинуваат генералот Стојановски, дека како припадник на воената полиција на ЈНА учествувал во вуковарските злосторства пред 14 години. Пред две години на Бриони, за Стојановски разговарале двајцата претседатели Трајковски и Месиќ. И тогаш Месиќ спомнал дека хрватските служби имаат документи за активностите на Генералот во Вуковар. За сегашните обвинувања чуле и во Брисел. Од НАТО не сакале да го коментираат случајот, но стравувале дека може да дојде до заладување на македонско-хрватските односи во Јадранската повелба. Коментар за случајот даде и Црвенковски. Вели, само Хашкиот трибунал може да обвини за злосторства во поранешна Југославија, а Македонија со тој суд има извонредна соработка. Наспроти Претседателот, ВМРО-ДПМНЕ обвини дека власта навистина добро соработува, но само со обвинителството на Дел Понте, а никако не ги дава документите на адвокатите на притворените Бошковски и Тарчуловски. „Македонија е единствениот случај во историјата на Трибуналот, на која и се сугерира со докази да ја поткрепи одбраната на обвинетите за нормален тек на постапката“, рече Груевски. Груевски најави, дека пратениците од ВМРО-ДПМНЕ утре во Собранието ќе поднесат декларација, со која ќе бараат сите шест хашки случаи од Македонија, вклучувајќи го и Љуботен, да се вратат во Скопје и тука да завршат со судски процеси.
|