Бучковски и Санадер во вторник ќе разговараат за Стојановски
25.11.2005 00:00
Македонскиот и хрватскиот Премиер во вторник во Загреб ќе разговараат за обвинувањата против началникот на ГШ на АРМ Мирослав Стојановски. Хрватското јавно обвинителство веќе не чека, отвори пред истражна постапка. Обвинителот Младен Баиќ потврдил дека ќе ја утврдува веродостојноста на информациите објавени во хрватските медиуми - дека македонскиот началник учествувал во воените злосторства во Вуковар во 91-та година. И Македонија и Хрватска се согласни, дека темата што ја отворија хрватските медиуми не смее да ги наруши добрите односи меѓу двете партнерски земји, изјави Бучковски по средбата со неговиот хрватски колега Санадер во Чешка. „Тоа што сега е актуелно - се договоривме повеќе да разговараме во вторник“, изјави Владо Бучковски, претседател на Владата на Македонија. „Не може ништо да ги наруши овие односи. Има проблем со Генералот, кој Премиерот и јас ќе го разгледаме“, вели Иво Санадер, претседател на Владата на Хрватска. Изборот на личноста што се наоѓа на чело на ГШ на АРМ е наша и само наша работа - кусо денеска коментираше врховниот командант Црвенковски. Што се однесува до воените злосторства од просторите на поранешна Југославија, најповикана и најнадлежна институција е трибуналот во Хаг, а неговата оценка е дека Македонија е држава која целосно соработува со трибуналот и може да служи за пример на некои земји кои произлегоа од поранешна Југославија - оценува Црвенковски. И Министерот за одбрана оценува дека мора да се зачува угледот на началникот. Досието на началникот на ГШ на АРМ Мирослав Стојановски е чисто, а Македонија е горда што има таков Генерал со висок професионализам, изјави Манасиевски, додавајќи дека обвинувањата против Стојановски се последица на внатрешно-политички пресметки во Хрватска. „Ова што ви го говорам не е само ставови на македонската Влада. Генералот Стојановски ги има поминато сите потребни НАТО процедури, што значи дека тој е офицер кој ужива апсолутна доверба“, рече Јован Манасиевски, министер за одбрана. Минатата седмица, по посетата на началникот на АРМ на Хрватска, хрватските медиуми ги обвинија властите дека со највисоки почести го пречекале Стојановски, кој во 91-та како капетан на ЈНА командувал со воена полиција во Вуковар.
|