Црвенковски нема да дозволи мешање за случајот Вранишковски
07.08.2005 00:00
 | | „Треба да се води сметка дека се работи за одлука на судската власт“ | | | |
Претседателот Црвенковски денеска им порача на српските функционери, кои преку медиумите бараа ослободување на Вранишковски, дека Македонија нема да дозволи мешање во своите внатрешните работи. Според Претседателот, нема никаква причина било кој поединец или институција во Србија, да се ангажира во овој случај. „Кога говориме за лицето Вранишковски, говориме за државјанин на РМ, за лице кое не е припадник на српското национално малцинство во Македонија, за лице кое се обидува да воспостави некаква црковна организација, која нема за задача да ги штити и исполнува религиозните чувства на Србите во Македонија, туку има за задача да ја супституира или негира МПЦ“, изјави Бранко Црвенковки. „Значи не постои ниедна причина, било кој како поединец или било која институција во Србија да пројавува било каков ангажман, бидејќи сето тоа би значело мешање во внатрешните работи на РМ“, рече шефот на државата. Тој не чувствува, дека на институцијата Претседател се врши дипломатски притисок. Досега никој од дипломатите во Скопје, од Претседателот не побарал со евентуална аболиција, да го ослободи Вранишковски. „Што се однесува до мене таков притисок не постои. Дури би рекол дека некој посебен интерес кај претставниците на меѓународната заедница во овој период по ова прашае не постои, а и кога би постоел, треба да се води сметка дека се работи за одлука на судската власт, која е независна од другите власти и тие одлуки треба да се почитуваат“, додаде Црвенковски. Неофицијално од Брисел, покрај прашањата за економските скандали, се најавуваат уште прашања, но овој пат за политичките процеси. Состојбата со човековите права, конкретно за пресудата на поранешниот македонски владика Зоран Вранишковски, е едно од новите прашања. Единствениот контакт кој Црвенковски го имал со некој од српските власти, е телефонскиот разговор со својот српски колега Тадиќ. На него било договорено да се преземат мерки, со кои ќе се спречи влошување на односите меѓу двете земји. Кои се мерките кои ќе ги спречат српските власти под контрола на Коштуница, а под силно влијание на СПЦ да се мешаат во внатрешните работи на Македонија - засега никој не кажува.
|