Поплави во Кумановско
08.05.2005 00:00
Околу 650 жители од кумановските ромски населби Средорек и Бавчи денеска се евакирани од нивните домови поради надојдените води на реката Кумановка при што 160 куќи синоќа беа поплавени. „Жителите од поплавените населби сместени се во Месната заедница 'Панче Пешев' и во објект на Медицински центар во населбата 'Карпош'. Во грижата за настраданите жители покрај Кризниот штаб на Општина Куманово вклучени се и ппштинскиот Црвен крст, Министерството за внатрешни работи и Медицинскиот центар - Куманово“, изјави претседателот на Кризниот штаб Бранко Арсовски. Поплавените жители синоќа ги посети и градоначалникот на Куманово Зоран Дамјановски при што вети санација на коритото на реката Кумановка. Од 2003 година ова е трето излевање на речното корито на Река Кумановка. И во претходните два наврати речиси 50 проценти од населбите Средорек и Бавчи беа поплавени.
|