Прва изложба на восочни фигури во Македонија
21.09.2004 00:00
Во Музејот на Град Скопје вечерва ќе биде отворена изложба на 23 восочни фигури, прва од таков вид во земјава, организирана во соработка со Музејот на восочни фигури од Санкт Петербург. Вкупната колекција на санктпетербуршкиот Музеј има 1.500 експонати распоредени во 47 тематски поставки. Експонатите се изработени во природна големина и се верна копија на познати имиња од светот на историјата, политиката, естрадата и науката. Меѓу 23-те копии на познати личности кои допатуваа во Македонија се Платон, Аристотел, Петар Велики, Пушкин, Наполеон, Сталин, Рузвелт, Черчил, Хитлер, Ајнштајн, Владимир Путин итн.. За изработка на една фигура учествуваат над 20 луѓе од различни профили, сликари, скулптори, маникири, педикири, костимографи и изработувачи на перики. За да се изработи еден експонат од восок, потребни се меѓу три и шест месеци, во зависност од сложеноста на фигурата. Косата, веѓите и трепките на фигурите им се изработуваат од природни влакна кои, едно по едно, се всадуваат во восокот, така што една просечна глава има околу 45.000 бодежи, а глава со брада и мустаќи има околу 60.000 бодежи. Фигурите се изработуваат од чист восок од пчели и издржуваат температура од -30 до 45 Целзиусови степени. Најфасцинантни за посетителите на изложбата се очите на фигурите кои изгледаат како вистински. Тие се изработуваат на познатата руска клиника „Фјордоров“. Се работи за очни протези кои се користат и кај луѓето. На ист начин се вградуваат и забните протези. За посетителите на изложбата во Музеј на Град Скопје ќе биде отворена Книга на впечатоци во која може да се запишат предлози и сугестии за изложбата или идеи за восочни фигури на личности од Македонија.
|