Георгиевски „Митингот можеше да помине подобро“
27.07.2004 00:00
 | | „Ова излегување на народот е доволен показател дека луѓето не го сакаат овој закон за територијална поделба“ | | | |
За слободниот стрелец Љубчо Георгиевски, како што тој самиот себеси се нарекува како припадник на партија без печат, синоќешниот митинг на опозицијата поминал во ред. Можело да биде и подобро, доколку тој бил поканет да учествува во организацијата на митингот, вели Георгиевски, но и вака народот покажал дека не се согласува со владиниот закон. „Организаторите решија да не ме повикаат, така што таму каде што не сте повикани не треба да одите. И ова излегување на народот е доволен показател дека луѓето не го сакаат овој закон за територијална поделба и дека треба нешто да се направи за неговата промена“, изјави Љубчо Георгиевски. Поддршката на меѓународната заедница за овој концепт на територијална поделба за Македонија, не значи ништо, вели Георгиевски. „Тие се само голи декларации за разнебитување на нашата држава, позади кои нема никакви конкретни одлуки, дури нема ни конкретна финансиска помош“, додаде Љубчо Георгиевски. Георгиевски и неговите следбеници, против законите засега ќе делуваат во Парламентот. Единствениот ефектен начин да се спречи територијалната поделба е да успее референдумот, вели Георгиевски. И потпретседателот на владеачката СДСМ Бучковски смета дека вистинска поддршка за иницијативата на опозицијата ќе бидат собраните потписи за референдум. Вчерашниот митинг нема ништо сериозно да промени, освен што ги зајакна позициите на дел од опозицијата која го организираше и со мирните протести се дистанцираше од радикалите кои стоеја зад настаните во Струга, изјави денеска Бучковски. Најавуваа над сто илјади граѓани, собраа 8 илјади, е коментарот на коалицискиот партнер ЛДП, според кој митингот на опозицијата покажал дека граѓаните не го поддржуваат нивниот концепт. „Ние ги повикуваме нашите опозициони колеги да се вратат на патот кон ЕУ и кон НАТО, затоа што тоа е иднината која што граѓаните на РМ ја посакуваат“, изјави Андреј Жерновски од ЛДП. Жерновски смета дека пратениците треба да постапат така и поради пораката од Советот на министри на ЕУ за поддршка на пакетот закони за децентрализација, што според него не смее да се потценува.
|