Страстите во ВМРО-ДПМНЕ само привидно смирени
29.05.2004 00:00
 | | Таборот на Груевски, како што се дознава, деновиве прави напори за преориентирање на пратениците кои застанаа зад Георгиевски | | | |
Страстите во ВМРО-ДПМНЕ се само привидно смирени велат партиски извори. Допрва ќе следува разврската која засега никој не сака да ја прогнозира. За лојалните на Груевски земјотресот поминал но потреси се уште може да има. Се дознава дека веќе нареднава недела ќе се одржи седница на Извршниот комитет во нов состав, без осумтемина блиски до спротивниот табор кои си поднесоа оставка. На седницата Груевски ќе ги отпочне подготовките за локалните избори, се очекува од општинските комитети да побараат да предложат кандидати за градоначалници. Таборот на Груевски, како што се дознава, деновиве прави напори за преориентирање на пратениците кои застанаа на страната на Георгиевски. Неговите приврзаници пак, отворено кажуваат дека во своите настапи во собранието нема да ги презентираат ставовите на Груевски и Самоиловска, туку ќе настапуваат како пратеници на народот и партиското членство. Веќе в понеделник пратеничката група на најголемата опозициона партија на седницата за избор на новата влада, ќе настапи без претходно усогласен став. И додека приврзаниците на Георгиевски тврдат дека дури 20 пратеници од вкупно 28 се со нив, според новото раководство голем дел од оние кои се потпишаа за оставка на Груевски ретерирале од ставот, правдајќи се со еуфорично расположение кое им било наметнато. Познавачите на состојбите во велат дека речиси е неверојатно да се помисли дека Георгиевски туку така ќе ја остави партијата. Напротив, неговиот потег да поднесе оставка на функцијата почесен претседател тие го оценуваат само како чекор кој би требало да ги разгори страстите кај членството и да докаже дека Груевски ја нема подршката во партиската база. Нивните напори сега се насочени во изнаоѓање механизам како да се предизвика вонреден конгрес без согласноста на партискиот лидер. Дел од нив не кријат дека ќе се обидат да издејствуваат конгрес преку собирање на партиски потписи, иако статутот ги ограничува во тоа.
|