Груевски извојува победа над Георгиевски
27.05.2004 00:00
 | | „Ново е што се ибрани 6-мина нови членови на ИК што претходно ги предложив“ | | | |
Лидерот на ВМРО-ДПМНЕ Никола Груевски синоќа извојува значајна победа над почесниот претседател Љубчо Георгиевски докажувајќи дека има контрола и подршка во речиси сите партиски тела. Мнозинството на највисокиот орган меѓу два конгреса, Централниот комитет на партијата, по синоќешната девет часовна седница застана зад Груевски гласајќи за неговиот предлог да го прошири извршниот комитет за шестмина нови членови од неговиот табор. „Ново е што се ибрани 6-мина нови членови на ИК што претходно ги предложив. Имаше разговори околу тоа кои се проширија и на други теми, анализа за изборите и друго“, изјави Никола Груевски. Незадоволни од поразот осуммината членови на извршниот комитет лојални на Георгиевски си поднесоа неотповикливи оставки. „Ова е партија која ја црпи својата моќ од базата, а не од одредени поединци од ЦК. 8-те члена на ИК си поднесоа неотповикливи оставки“, рече Ден Дончев. Одлуката на Централниот комитет кој заседаваше до 4 часот изутрина, дојде по писмено обраќање на Георгиевски кој не присуствуваше на седницата, туку нејзиниот исход го чекаше во седиштето на партијата, од каде одржуваше телефонски контакт со своите приврзаници. Во обраќањето прочитано од Игор Гиевски, почесниот претседател ги повторил барањата за оставка на потпретседателката Ганка Самоиловска Цветанова или свикување на вонреден конгрес. Во своето писание Георгиевски рекол дека доколку овие предлози не бидат прифатени тој е подготвен да се повлече од функцијата почесен претседател. „Изненаден сум од тоа писмо кое мислам дека го донел во нервозна ситуација и се надевам дека ќе ја смени таа негова одлука и лично ќе го повикам да не го прави тоа. Туку да помогне на ВМРО-ДПМНЕ и на сите оние кои сакаат Македонија да успее“, вели Груевски. Во исто време, лидерот на ВМРО-ДПМНЕ синоќа рече дека во наредните денови ќе реши дали ја прифаќа оставката на потпретседателката Цветанова, депонирана вчера попладне, но условена со оставка на членовите на Извршниот Комитет. Во партијата коментираат дека со надгласувањето во Централниот Комитет Груевски докажал дека има сила и може да надвладее, но дека кризата во партијата не е завршена, особено што лидерот се уште нема контрола врз пратеничката група.
|