Георгиевски: „Смена на Ганка или вонреден конгрес“
26.05.2004 00:00
 | | Љубчо Георгиевски | | | |
Лидерот на ВМРО ДПМНЕ Никола Груевски за денеска попладне закажа седница на централниот комитет на партијата, клучна во битката со почесниот претседател Љубчо Георгиевски. Пет часа пред почетокот на седницата и по една недела молчење се огласи почесниот претседател Љубчо Георгиевски. Тој ја бара потпретседателката на партијата Ганка Самоиловска Цветанова за жртва, која треба да ја понесе вината за расколот во ВМРО ДПМНЕ. Георгиевски предлага по разрешувањето на Цветанова, а Груевски и натаму да остане на чело на партијата. Како втора варијанта Георгиевски нуди заедно со Груевски да организираат вонреден конгрес за разрешување на кризата. „Искрено се надевам и очекувам, за доброто на ВМРО ДПМНЕ, претседателот Груевски да изнајде сили и рационалност да прифати еден од овие два мои предлога“ се вели на крајот на соопштението на Георгиевски. По обраќањето на Георгиевски, Цветанова за А1 изјави дека попладнево ја депонирала својата оставка, но во исто време бара свои оставки да понудат и останатите членови на извршниот комитет лојални на Георгиевски. Според неа, осумтемината треба да си дадат оставка, бидејќи тие се генератор на кризата. За сега е нејасно каков ќе биде одговорот на Груевски. Но, извори во партијата велат дека самиот податок дека денеска закажал седница на централниот комитет која е предвидена да биде продолжение на седницата од пред две недели, која беше прекината по насилниот упад на симпатизерите на Геоергиевски, значи дека тој ја одбил понудата. На дневен ред вечерва треба да биде проширувањето на извршниот комитет за уште шестмина нови членови од таборот на Груевски. Доколку оваа точка биде усвоена тоа ќе значи дека Груевски остварил превласт, а во спротивно велат нашите извори тој ќе поднесе оставка и ќе му ја остави партијата на Георгиевски.
|