30 дена притвор за Љупчо Поповски
29.04.2004 00:00
 | | Љупчо Поповски | | | |
30 дена притвор за државниот секретар за одбрана Љупчо поповски, кого полицијата го фатила со 15.000 евра обележани пари што ги примил како мито. Парите ги побарал за трансакција со земјиште сопственост на АРМ. На лице кое полицијата не го именуваше Поповски му понудил да му заврши работа во денационализација на армиски имот. За услугата во минатата година Поповски наплатил 30.000 евра, а во април барал уште 20.000. Добил пет, а потоа ги побарал и останатите 15. „По претходнио добиени информации е извршен претрес на пријавениот и во неговиот внатрешен џеб од палтото е пронајден плик во кој се наоѓале договорените 15.000 евра“, изјави Мирјана Контевска портпарол ан МВР. Во Министерството за Одбрана денеска јавно не ја коментираа „зделката“ на нивниот државен секретар. Што си дробел тоа ќе срка, беа најчестите коментари од таму. Во СДСМ велат дека ова не е внатрепартиска пресметка, туку борба против митото и корупцијата. Поповски своевремено беше генерален секретар на партијата и близок до Црвенковски и Бучковски. „Правото мора да важи за сите особено за оние кои имаат функции во оваа држава“, рече Шекеринска. Пријавете мито и корупција во полицијата и институциите на телефон 199 ја промовираше кампањата денеска МВР. Кој и зошто и го пријавил Поповски на полицијата за сега не се знае? Ова не е прв случај на финансиски малверзации во одбраната. Љубен Пауновски министер во владата на Георгиевски доби затворска казна од пет и пол години затоа што префрлал милионски суми евра на фирми на свои блиски роднини.
|