СЕЕМО загрижена за нападот на грчкиот новинар
08.01.2004 00:00
Организацијата за медиуми на југоисточна Европа (СЕЕМО), со седиште во Виена, синоќа соопшти дека е „длабоко загрижена поради бруталниот напад врз грчкиот новинар Антонис Пападопулос“. Новинарот Пападопулос, на 28. декември, после серија телефонски обвинувања, со снимателска екипа отишол во една атинска болница каде го снимал очајниот третман на болните. Притоа, тој немал проблеми, но набргу дошле лица од фирма за обезбедување задолжени за воспоставување ред во болницата, и го нападнале Пападопулос и неговата екипа. Новинарот бил претепан, па потоа однесен во подрумот каде бил сослушуван. Наскоро, била повикана полицијата, која ги привела лицата од обезбедување и новинарот во полициската станица. Телевизиската аудио-снимка каде бил снимен целиот инцидент беше прикажана во целата земја. СЕЕМО ги повикува грчките власти да спроведат истрага и одговорните за напад врз новинарот да го предадат на судските власти. Организацијата бара да се превземат сите можни мерки со цел новинарите во Грција да можат безбедно да ги извршуваат професионалните задачи.
|