Во Ирак има околу 2.350 споменици на Садам Хусеин
10.04.2003 00:00
 | | Казните за сквернавење на спомениците биле бескрупулозни | | | |
Во Ирак има околу 2.350 споменици на Садам Хусеин кои беа поставувани како дел од „монументалната пропаганда“ што ја спроведуваше ирачкиот режим, објавува саудискиот весник „Аш Шарк Ал Аусат“. За изработка на спомениците во близина на Багдад постоела ливница во која работеле 80 вајари и други работници, а за заштита на обележјата на Хусеин било формирано и специјално полициско одделение. Казните за сквернавење на спомениците биле бескрупулозни. Како пример за тоа се посочува случајот со едно малолетно момче кое откинало едно уво од статуата на Хисеин во Басра. За казна полицијата на детето јавно му ги исекла двете уши. Во провинцијата Зу Гар десетина локални функционери завршиле в затвор поради тоа што непознати лица го гаѓале со домати споменикот на ирачкиот претседател. „Аш Шарк Ал Аусат“ наведува дека статуата на Садам Хусеин во центарот на Багдад висока 14 метри, чие уривање вчера го пренесоа сите светски телевизии, била изработена минатата година во Италија, а само нејзиниот транспорт до Ирак чинел 250.000 долари. Весникот потсетува дека во Багдад има уште стотина споменици на Хусеин, а огромен број негови фотогрофии висат во сите јавни згради, хотели и други објекти во ирачката престолнина.
|