СЕЕМО се плаши од згаснување на четири весници од НИП
29.11.2002 00:00
 | | „Нова Македонија“, „Фљака“, „Бирлик“ и „Вечер“ се пред згаснување | | | |
Недопустливо е весниците „Нова Македонија“,„Фљака“, „Бирлик“ и „Вечер“ кои се печатат на македонски, албански и турски јазик и имаат традиција од околу шест децении, да згаснат, поради манипулации и вештачко предизвикување на недостиг на рото хартија. Ова предупредување е содржано во писмото што СЕЕМО, Организација за медиуми во Југоисточна Европа, во состав на Меѓународниот институт за печат, со седиште во Виена, го упати до претседателот Борис Трајковски и премиерот Бранко Црвенковски. Во него се изразува најдлабока загриженост и претседателот и премиерот се повикуваат да сторат се што е во нивна моќ за да спречат згаснување на четири дневни весника. Притоа се предупредува дека на вработените во „Нова Македонија“, „Фљака“, „Бирлик“ и „Вечер“ кои иако пред три недели стапија во штрајк, а не примиле плати за шест месеци, секојдневно подготвуваат и печатат весници, сега се пред згаснување, бидејќи има закани дека ќе останат без рото хартија. Пред тоа, старо-новото раководството, кое одбива да разговара за барањата на вработените, ги исклучи парното греење, лифтовите и водата, а сега се заканува и со недостиг на рото хартија. Доколку тоа се случи, тоа ќе значи згаснување на четири дневни весника кои информираат на македонски, албански и турски јазик, се вели во писмото на СЕЕМО. Во него се поздравуваат одлуката на Владата на премиерот Бранко Црвенковски да отвори легална процедура за преиспитување на купопродажниот договор, како и определбата на Владата НИП да не се врати во сопственост на државата. Имајќи предвид дека состојбата во „Нова Македонија“ е критична, а процедурата на преиспитување може да потрае, СЕЕМО и ИПИ ги повикуваат претседателот Трајковски и премиерот Црвенковски да сторат се што е во нивна моќ за да спречат згаснување на четири дневни весника.
|