Колони туристи се враќаат од Грција

Сузана Тасева	Коментари (11)

Со полна пареа денеска се работеше на граничниот премин „Богородица“. Во осум ленти се влегуваше во Македонија од Грција. Најбројни беа српските државјани, денеска им завршувал десетдневниот одмор. Нивните искуства од неколкудневната криза со горивото се различни.

„Ситуацијата за странските туристи е добра, кога ќе ги видат таблиците ставаат гориво, знаат отприлика колку треба до граница за да можеме безбедно да се вратиме. За нивните граѓани моментално има ограничување до 30 литри за да може во пресрет да им се излезе на гостите“ вели турист од Србија.

„Едвај чекавме да дојдеме до Македонија за да наполниме гориво“ додаде турист.

„Купивме бензин кај нив на некои приватни пумпи пред 3-4 дена, сега нема“, рече турист од Србија.

Драстично е зголемен бројот и на грчките државјани кои во Македонија доаѓаат само по гориво. Од две илјади пред кризата, сега дневно доаѓаат меѓу четири и пет илјади Грци.

„Доаѓаат исклучиво поради кризата за бензин бидејќи на 500 метри од граничниот премин имаме две бензински пумпи, точат гориво и се враќаат“, изјави Никола Стамов, командир на полициската станица на граничниот премин „Богородица“.

Литар бензин сега во Грција се продава по цена од едно евро и седумдесет центи до две евра. Кризата со гориво не ги поколеба ни оние кои допрва таму планираат да заминат на летување.

Велат дека се информирани за кризата и во Грција влегуваат со полни резервоари. Дневниот проток на патници на граничниот премин „Богородица“ е околу 25 илјади луѓе, најбројни се Србите, а бројот на Македонците се движи меѓу осум и десет илјади.

Недостигот на гориво во Грција се појави со штрајкот на возачите на цистерни кој почна пред пет дена и не се знае кога ќе заврши. Поради ова на стотици илјади туристи им е загрозен одморот, а туристичкиот углед на Грција е оцрнет, поради што се откажуваат туристичките ангажмани.

За печатење

Прати по e-mail

Порака до авторот

Разгласи