За новинарите од Канал 5 се интересира меѓународната заедница

Сашка Цветковска	Коментари (5)

Весна Ковачевска Трпчевска

„Драга Весна, не сум крив“ - вака шефот на кабинетот на премиерот, Мартин Протоѓер одговори на обвинувањата дека преку него се вршеле притисоци врз новинарите во Канал 5 телевизија. Во писмо до отпуштениот новинар од Канал 5 негира дека се мешал во работата на новинарите и дека учествувал во отпуштања на новинари.

„Обвинувањата дека сум се мешал во уредувачката политика на телевизијата апсолутно не се точни. Но, нив можам да ги разберам затоа што ги гледам како дел од една очигледна и валкана политичка кампања во која ти статираш, можеби и несвесно, не знам“ - се вели во отвореното писмо од Протоѓер.

Во емотивното писмо до Весна Ковачевска Трпчевска тој се нуди и да помогне, зашто отсекогаш се залагал за слободно новинарство.

„Мене ме имаш на своја страна, а ако сум толку моќен колку што велиш, тогаш нема од што да се плашиш, кога ме имаш мене, Весна“.

Освен до новинарот, Протоѓер ја повикува и Канал 5 телевизија да и објасни на јавноста дека тој и Владата никогаш не се мешале во работата на уредништвото.

Во меѓувреме, реакциите околу случајот со отпуштените новинари растат. Од македонскиот институт за медиуми велат дека ова е само уште еден пример кој ги исфрла на површина долгогодишните проблеми на новинарите.

„Неопходно е медиумскиот бизнис да се трансформира во бизнис кој што ќе живее од квалитетот на тоа што го нуди, а не да биде поддржувачка активност на било кој центар на моќ. Се додека имаме ваква ситуација ќе се вртиме во круг, меѓутоа мислам дека ние сме во фаза кога целокупниот медиумски систем во Македонија е пред колапс“, изјави Билјана Петковска, македонски институт за медиуми.

А по случајот со отпуштените новинари од Канал 5 телевизија, меѓу кои дел обвинија дека се работеле под притисок од власта, за македонската медиумска состојба повторно интерес пројави меѓународната заедница.

По разговорите во американската амбасада, денес новинарите беа повикани и во ОБСЕ. Во Фокусот биле состојбите со слободата на медиуми и работничките права на новинарите.

Реакција стигна и иницијативниот одбор на реформи во здружението на новинари - бараат новинарски синдикат, здраво новинарско здружение, но и праќаат апел да власта - да се држи до својата улога и да ги стави во функција инспекциските служби со што ќе обезбеди еднаков амбиент за работа, каде законите ќе важат за сите медиуми.

За печатење

Прати по e-mail

Порака до авторот

Разгласи