Стоп за цензурата во новинарството

Сашка Цветковска	Коментари (17)

Весна Ковачевска Трпчевска

Не прифативме диктати од власта - вака својот отказ го објаснуваат дел од групата новинари кои деновиве без образложение добија откази од менаџментот во Канал 5 Телевизија.

За притисоците во куќата прва проговори долгогодишниот новинар Весна Ковачевска Трпчевска која и преку отворено писмо директно му се обрати на премиерот со обвинувања на адреса на власта за ситуацијата во која се доведени.

„Имаше ситуации кога одреден новинар ќе се појавеше на конкретен настан, опкружувањето на Премиерот ќе дознае што е темата на прашањата, потоа ќе се јават кај врвот во телевизијата и врвот на телевизијата ќе нареди тоа прашање да не биде поставено. Е така е направен списокот на неподобни новинари.

- Имало ситуации кога на интерфон слушаме како Мартин Протуѓер дава агенда како одредена тема да се работи во текот на една недела или можеби подолго. Нашата непослушност беше во тоа што немавме директен контакт или не сакавме да имаме директен контакт со шефот на кабинет на Премиерот, Мартин Протуѓер“, рече Весна Ковачевска Трпчевска, поранешен новинар во Канал 5 Телевизија.

За формите на притисоците илустрација даваат и помладите новинари. Ги казнувале од платата кога одбивале да интервјуираат владини функционери кои без причина сакале да бидат вклучени во одредени теми.

Ида Протуѓер

„Кога јас тоа го поставив како прашање на еден од интерните состаноци на редакцијата, мене во една завиена форма ми беше објаснето дека јас всушност треба да бидам пример за сите во редакцијата, дека доколку некој од високите функционери побара од нас да го вклучиме во некоја тема, ние не смееме да го одбиеме. И дека всушност моето казнување од плата треба да е пример за сите останати во редакцијата“, вели Христена Антовска Јованчева, поранешен новинар во Канал 5 Телевизија.

Владата ги негираше сите обвинувања, а од уредништвото на Канал 5 возвратија дека тие не им дале откази, туку им понудиле спогодбени раскинувања на договорите. Дополнително во во соопштението стои „свесни сме дека Ковачевска е самохрана мајка и ја преземаме целосната одговорност да се грижиме за нејзиното малолетно дете кога тоа и претставува тешкотија“.

Освен штуро соопштение, друга реакција од здружението на новинари не дојде. Засега интерес за случајот пројави американската амбасада каде денес со отпуштените новинари се разговараше за медиумската слобода. А дека состојбите во медиумите се страшни коментираат и другите новинари.

„Јас бев во слична ситуација, така што многу добро ги разбирам. И јас си отидов од Канал 5, тогаш немав ни поддршка од останатите колеги во редакцијата, но потоа им се случи истото. Еден по еден од истите причини си заминуваа и затоа и давам поддршка, бидејќи знам низ што јас поминав, а сега се и повеќе“, изјави Ида Протуѓер, телевизија Алфа.

Драган Антоновски

„Секој новинар треба да знае дека оваа приказна утре може да тропне на неговата врата. Ако денес молчи и ако не застане во одбрана на нашите колеги, утре нема да има кој да го брани кога истото нему ќе му се случува“, вели Сашо Коколанов, весник Дневник.

„Се ова е последица на неорганизираност на новинарите, последица на немање на здружение на новинари, немање на некакво синдикално здружение. Значи треба едно лидерско здружение, каде што ќе има луѓе со авторитет, кои што апсолутно ќе застанат зад она што значи фела. Значи на здружението му требаат новинари“, рече Драган Антоновски, телевизија Сител.

Со половина црна страница во знак на протест и поддршка до колегите утре ќе излезат скоро сите печатени медиуми. А новинарите од Канал 5 ќе чекаат да се огласи нивното здружение, но правда ќе бараат и на суд.

За печатење

Прати по e-mail

Порака до авторот

Разгласи