Додека беше во затвор во нивата на Илиевски никнале нови стебла марихуана

Пеце Стефановски	Коментари (13)

Во нивата со компири на млекарот Душко Илиевски и на неговото семејство во Градско поле каде што полицијата откри канабис, за само петнаесет дена повторно израсна ова растение.

Камерата на А1 забележа барем триесетина стебла со одлична вегетација, непосредно до местото каде што полициските инспектори го обезбедуваа крунскиот доказ, докажувајќи дека канабисот е одгледуван, иако и тогаш и сега, под сите плевели нивата е полна со компири.

„Во петнаесет дена, видете колку има израснато канабис. Значи, јас не излегов од притвор да го посадам. Овој канабис во Градско поле сам излегува“, рече Душко Илиевски.

Меѓутоа, и покрај овој неспорен факт, одбраната со вештачење ќе докажува дека станува збор за самоникнат канабис и дека полицијата ги нарушила законските процедури во обезбедувањето докази.

„Исклучиво мал дел на некои од овие растенија и тоа на врвовите од листовите може да се добие некој благ вид на марихуана. Тоа ние не можеме да го утврдиме, тоа конечно треба да го направи една непристрасна установа. Ова докажува дека полицијата врз себе го презеде правото да врши и вештачење, а тоа според Законот за кривична постапка не е допуштено“, вели адвокатот Васко Ѓоргиев.

Но, каква ќе биде судбината на дивиот канабис во битолско?

Значи, треба да се уништи и дивиот канабис во битолско, кој вирее на секаде во Градско поле, па дури и на самата периферија во градот. Денеска, дури и младите социјалдемократи од Битола, апелираа ова растение да биде уништено.

„Сакаме да упатиме апел до невладините и образовните организации, партиските подмладоци и институциите на државата, на еден организиран начин да го исчистиме Градско поле од дивиот коноп, се со цел, да го симболизираме почетокот во справувањето со најголемиот порок на денешницата“, изјави Александар Геновски, потпретседател на младите социјалдемократи на Македонија.

Дека камчињата од мозаикот на овој случај се повеќе создаваат слика дека навистина ќе биде тешко да се срочи обвинителен предлог, говори уште еден факт, дека нема обвинение за поединец и дека тројцата земјоделци се обвинети онака на куп.

Бидејќи кривичната пријава ги товари само тројцата земјоделци Томе, Душко и брат му Цане,сепак, во инкриминираната нива во која што е пронаден канабисот, работеле и мајката Лиле, но и снаите Вера и Нора. Прашање е, зошто против жените не е подигнато обвинение и дали обвинителниот акт ќе мора да го опфати целото семејство, бидејќи досега не нашле да посочат ниту еден поединец за производство и трговија со дрога.

Искусни кривичари прашуваат, како ќе беше изведено обвинение, на пример, ако стануваше збор за убиство?

За печатење

Прати по e-mail

Порака до авторот

Разгласи