Владата и ЕВН се смирија за да се договорат
28.07.2010 18:58
 | | Владимир Пешевски | | | |
Австријците од ЕВН ќе ја стават во мирување тужбата што пред арбитражниот суд во Вашингтон ја покренаа против Македонија. Во меѓувреме спорот што го имаат државната компанија ЕЛЕМ и австриски ЕВН ќе се води на домашен терен во македонските судови. „Што се однесува до спорот помеѓу ЕЛЕМ и ЕВН, следното судско рочиште очекуваме да се одржи каде што компаниите ќе побараат од судот, судско спогодување, базирано на вештачење од вешто лице“, изјави Владимир Пешевски, вицепремиер за економски прашања. „Свесни сме дека ни се потребни неколку месеци за конечно решавање на сите отворени прашања, но сега сме успешни во градењето меѓусебен доверба и ова ќе биде основата за интензивна работа и преговори кои ни претстојат“, вели Гинтер Офнер, претставник на ЕВН во Македонија. Во екот на несогласувањата власта ја прогласи ЕВН за пример на лош инвеститор. „Мислам дека изјавата на премиерот Груевски во голема мера придонесе позитивно да дојде до една ваква разрешница, бидејќи со тој јасен став беше кажано дека владата на РМ цврсто ќе ги брани своите позиции. Со такви позиции влеговме во овие разговори и со такви силни позиции излегуваме од овие разговори. Јас кажав и на пресот, сметам дека ЕВН особено по принципите кои што ги договоривме во изминатиот период е инвеститор каков што и треба на РМ“, додаде Владимир Пешевски, вицепремиер за економски прашања. Спорот на Државните електрани со ЕВН ги наруши односите на Македонија со Австрија. Одекна и до Брисел. Сериозни повреди при водењето на постапката во основниот суд, констатираше и Апелациониот суд поради што ја поништи првичната одлука на Основниот суд Скопје 2, со која ЕВН требаше да им исплати речиси 200 милиони евра на државните електрани, за ненаплатени побарувања од 95-та до 2004-та година и процесот повторно го врати назад во судот по што следуваше денешното затоплување на односите и на двете компании чиј спор ја крена на нозе енергетската заедница.
|