Ударничко темпо на задолжување на владата

Мишко Иванов	Коментари (14)

Јован Манасиевски, ЛДП

Ударничко темпо на задолжување на власта. За само една година Македонија се задолжила со неверојатни 430 милиони евра, тврди опозицијата, реагирајќи на последната владина одлука, земјата да повлече 70 милиони евра од Меѓународниот монетарен фонд, пари кои следуваат од специјалните права на влечење од квотата на фондот.

„На Владата што вели нашиот народ и чади од сите страни, многу дупки има да се затворат. За само една година десет кредити имаме земено, една еврообврзница од 175 милиони евра и овие 85 милиони долари од ММФ“, изјави Јован Манасиевски, ЛДП.

Со новото задолжување ќе се регулира минусот на буџетската сметка, објаснува Владата.

„Ќе бидат овие средства искористени за буџетот на РМ, ќе биде финансиран дефицитот“, вели Недим Рамизи, заменик министер за финансии.

Недим Рамизи, заменик министер за финансии

Долговите на државата се трупаат, собирањето пари во државната каса оди слабо, велат опозиционерите.

„Кажете ни за што ќе се трошат овие пари конкретно, колку долг ќе вратите, колку ќе го потрошите другиот дел за плати и други непродуктивни расходи и дали од овие средства ќе користите и да отплатите дел од долгот што го имате кон компаниите“, вели Марјанчо Николов, СДСМ.

„Не би се впуштал сега во расправа дали ќе се финансираат вработувања, дали ќе се финансираат други непродуктивни активности, сепак тоа е политика на самата влада, за што ќе ги троши тие средства“, вели Недим Рамизи, заменик министер за финансии.

И покрај сите апели на домашната експертска јавност земјата што поскоро да склучи аранжман со ММФ, власта не размислува за такво нешто. Собраниската Комисија за финансирање и буџет пак денеска го одобри Предлог законот со кој земјата ќе повлече 70 милиони евра од Меѓународниот монетарен фонд.

За печатење

Прати по e-mail

Порака до авторот

Разгласи