Патот Маврово - Дебар прооден
14.03.2010 18:21
Се топи снегот на планината Бистра. Вода блика од секоја страна, што може да биде причина за нови лизгања на земјиштето. Водата извира од местата каде што се случија одроните. Излегува и од напукнатите потпорни ѕидови на патот Маврово - Дебар. Маса од земја и снег се спуштила и во коритото на реката Радика, но за среќа не го блокирала нејзиниот тек. Последната лавина која се случи пред три дена е расчистена. Сепак, опасноста останува. „Воглавно се одржува постојано. Екипите на Македонија пат се постојано тука и координирани сме. Сега е добро“изјави Мукрем Мехмеди, градоначалник на општина Маврово - Ростуше. Министерот Миле Јанакиевски денеска рече дека се чувствува безбедно на местото каде што се случи најголемиот одрон, долг околу половина километар. Најави поставување заштита од лизгање на земјиштето, на почетокот на мај. „Експерти од Градежен факултет да направат увид и доколку се работи за активно свлечиште, тогаш владата на Република Македонија ќе интервенира и ќе направиме потпорни ѕидови, со цел во иднина да не се случуваат вакви појави“, рече Миле Јанакиевски, министер за транспорт и врски. Само во изминативе триесетина дена, на оваа магистрала се случија повеќе од десет поголеми одрони.
|