Овчеполските земјоделци повторно на протести
09.03.2010 15:39
Овчеполските земјоделци со тракторите повторно излегоа на улица. Одржаа предупредувачи протест низ улиците на Свети Николе. Имаат листа со 9 барања што ги доставија до Министерството за земјоделство. Најголемиот дел од нив се однесуваат за намалување на придонесите и олеснување на постапката за добивање на субвенциите. „Бараме за аплицирањето за субвенции за 2010 да не се бараат потврди за платени придонеси кон ПИОМ и ФЗО, да се намалат придонесите и да се плаќаат еднаш годишно“, вели Јованче Крстев, земјоделец од Свети Николе. 560-те индивидуални земјоделци се жалат дека поради воведувањето на нови давачки пари кај нив се помалку има. „Воопшто немаме пари да плаќаме никакви давачки, крај е со нас“, вели Ангел Стојчев, земјоделец. „Ќе се мачиме ќе се мачиме, бидејќи немаме каде, но после нас земјоделци нема да има повеќе“, вели Љубе Анастасов, земјоделец. Денешниот протест се одржа во организација на Здружението „Овчеполски фармер“, со поддршка на Конфедерацијата на независни синдикати, од каде најавија радикализација на протестите. „Доколку до петок не добиеме одговор ќе излеземе на протести надвор од Свети Николе, кај обиколницата кон Штип, Велес и Куманово“, вели Гоце Делчев Тодев, Конфедерација на независни синдикати. Организаторите најавија дека очекуваат во нивните барања да им се приклучат сите регистрирани земјоделци, кои само во Источна Македонија ги има околу 12.000 илјади.
|