Црвенковски во посета на текстилците во Кочани

Виолета Кожинкова	Коментари (3)

Лидерот на опозицијата, Бранко Црвенковски во посета на текстилците во Кочани. Освен на кризата и полните магацини, текстилците му се пожалија за високите давачки кон државата.

„Единствено решение кое може да ни помогне во моментот е помошта на државата во насока на намалување на давачките по сите основи кон неа“, рече Благој Ситниковски, „Голден текс“-Кочани.

Црвенковски ја обвини Владата за лошата состојба во текстилството, и праша зошто текстилците не добија државни субвенции за излез од кризата како што побараа лани.

„Владата тоа барање го одби со образложение дека пари за такво нешто во буџетот нема. Во исто време во јавниот сектор за овие 4 години се вработија нови 30.000 луѓе. И на крај Владата промовира и веќе почна да реализира проект „Скопје 2014“ што ќе чини 200 милиони евра. Проекти за кои има пари“, рече Црвенковски.

Првиот опозиционер се сретна со неколку отпуштени текстилни работнички кои поради кризата, веќе една година наместо на машина седат дома, а некои од нив останале без ништо за ди си го платат лекувањето.

„Си ги продадовме нивите да купиме лекови. Имам две деца прва и втора година, а немаме веќе што да продаваме“,се пожали Соња Минова, поранешна текстилна работничка.

Црвенковски ја повика Владата да престане со неодговорното трошење на народни пари и наместо кон статистика и споменици да се сврти кон реалните луѓе.

Реакција на ВМРО-ДПМНЕ

На посетата на Црвенковски на текстилците реагираше владејачката ВМРО-ДПМНЕ. Според партијата, на лидерот на СДСМ не му е местото меѓу текстилните работници, бидејќи тој бил главниот виновник за уништувањето на оваа индустрикска гранка во земјава.

„Неприфатливо е со монтирани и селективно избрани посети да се создава впечаток за невиноста на Бранко Црвенковски. Во времето на владеењето на Бранко Црвенковски и СДСМ, беа отпуштени 198 илјади и 364 работници од своите работни места, беше уништена текстилната индустрија“, изјави Александар Бичиклиски, портпарол на ВМРО-ДПМНЕ.

За печатење

Прати по e-mail

Порака до авторот

Разгласи